Երևանի Ալ. Բլոկի անվան հ. 122 դպրոցում կայացավ «Նախագծային ուսուցում 2024» միջոցառումը, որի հյուրն էին նաև ԿԶՆԱԿ հիմնադրամի գնահատման մեթոդաբանության մշակման և մշտադիտարկման բաժնի մասնագետները:
Հետաքրքիր էր տեսնել Հանրակրթության պետական նոր չափորոշչի ներդրման ուղղությամբ 2-րդ, 5-րդ և 7-րդ դասարաններում իրականացրած աշխատանքի արդյունքը:
Բացի այն, որ երեխաները սիրով ներկայացնում են իրենց ձեռքբերումները, նաև պատմում են դրանց հասնելու ընթացքի մասին, թվարկում այն քայլերը, որոնք իրականացրել են՝ պարբերաբար վստահանալով, որ ճիշտ ուղու վրա են: Օրինակ՝ շատ են սիրում գունավոր բվիկները, որոնց միջոցով ամեն դասի ավարտին ցույց են տալիս՝ ինչպես են աշխատել, ինչ չափով են հասկացել, արդյոք օգնության կարիք ունեն...
Ելքի քարտերն ու ինքնագնահատման աղյուսակները դարձել են ուսումնական գործընթացի պարտադիր բաղադրիչ, և երեխաներն ազատ խոսում են դրանց կիրառման մոտեցումների ու տված օգուտի մասին: Վարժ են իրենց խոսքը վերջնարդյունքներին համապատասխան ձևակերպելիս, իրենց և ընկերների աշխատանքը մեկնաբանելիս:
Ուսուցիչները ևս ոգևորված են նախագծային ուսուցմամբ և դրա արդյունքներով, տեսնում են՝ ինչպես են խաչվող հասկացությունները կապող օղակ դառնում ուսումնական նյութի ու կյանքի միջև, ինչպես են գնահատման տարբեր գործիքների կիրառմամբ սովորողները ստանձնում պատասխանատվություն սեփական ուսումնառության նկատմամբ, դառնում ավելի ակտիվ ու ներգրավված:
Comments
Post a Comment